علاج الصلع وتكثيف الشعر عن طريق الإبر الدقيقة او الديرما رولر

 

السلام عليكم ورحمة الله وبركاته

اتكلمت في حلقات كتيرة عن فايدة المينوكسيديل لفروة الراس وٍعلاج الصلع الوراثي وزي ما قولت مميزاته وعيوبه في الفيديوهات اللي فاتت قولت كمان انه دايما محتاج عوامل مساعدة معاه عشان تقدر توصل لافضل نتيجة

ومن افضل الطرق اللي بتساعد على اعادة نمو الشعر هي الديرما رولر

وفي الفيديو دة هنتكلم عنها  بالتفصيل وطريقة استخدامها مع المينوكسيديل وكام مرة وايه افضل ديرما ممكن تجيبها وتجيبها منين.

بس قبل ما نبدأ متنساش تشترك في القناة وتفعل الجرس وتتابعني على صفحتي على الفيس بوك عشان يوصلك كل جديد

أهلا بيكم مرة تانية

أنا محمد سويلم والناس اللي اول مرة تشوف فيديوهاتي انا كنت بالشكل دة وخلال فترة مش كبيرة بقيت بالشكل الحالي ودة بفضل المينوكسيديل والعوامل المساعدة اللي بستخدمها معاه واللي هنتكلم عن واحدة مهمة جدا منها وهي الديرما رولر وازاي تستخدمها وايه موانعها

 

والديرمارولر دي عبارة عن اسطوانة دائرية بيكون فيها ابر كتيرة ودقيقة جدا  وعددهم واحجامهم بيختلف على حسب طبيعة الاستخدام

وبيتراوح طول الابر ما بين 0.2 ولحد 1.5 مل بالاضافة انها بتوصل لاحجام خاصة لحد 3 مل وطبعا طول الابره بيحدد عمق الدخول في الشعر

وطبعا كل ما كانت الابرة طويلة كل ما كان الالم بتاعها اكبر ولذلك الابر ال3 مل مش بتستخدم الا في العيادات وتحت اشراف اطباء وفي حالات خاصة

وبالنسبة لعدد الابر بيدأ من 90 ابرة لحد 540 ابرة

 

طيب هي الديرما رولر دي بتعمل ايه

الديرما رولر ببساطة بتعمل جروح دقيقة جدا في فروة الراس ودة بيحفز الجسم على انه ياخد رد فعل علاجي وبالتالي بيبدأ الجسم بتنشيط الخلايا اكتر في المنطقة دي وطبعا في الحالة دي الجسم بينتج بروتينات بتساعد على تغذية بصيلات الشعر وتنشيطها وطبيعي بعد كدة الشعرهيكون اقوى وكثافته اعلى

وطبعا الديرما رولر مش لفروة الراس بس وممكن تستخدم في اماكن تانية زي البشره وغيره وممكن تشوفو الفيديو دة عشان تعرفو اكتر عن استخداماتها

 

نتكلم بقا عن الديرما رولر لعلاج الصلع وتساقط الشعر مع المينوكسيديل

طبعا كلنا عارفين ان المينوكسيديل الدوا الاشهر عالميا في علاج الصلع الوراثي وتساقط الشعر

زي ما المينوكسيديل ممكن تستعمله لوحده وهيكون له نتيجة ايجابية بس بطيئة بردو الديرما رولر ممكن تستخدمها لوحدها وبردو هيكون ليها نتيجة جيدة بس بردو هتكون بطيئة

بس لو هنستخدم  الديرما رولر مع المينووكسيديل هنلاحظ نتايج ممتازة ودة لان الديرما رولر بتفتح مسام او ممرات خفيفة في فروة الراس بتسمح لفروة الراس بامتصاص الدوا وسهولة وصولة للبصيلة وبالتالي الحصول على اكبر استفادة منه

المهم انك متستخدمش المينوكسيديل بعد الديرما رولر مباشرة ويفضل تنتظر على الاقل ساعة  ل 3 ساعات خصوصا اللي بشرتهم دهنية على ما فروة راسك تكون مستعدة  لانك لو استعملت المينوكسيديل قبل المدة دي ممكن يحصل التهابات وممكن تأثيرها على الشعر يكون عكسي والنتايج سلبية

لكن ممكن تستخدم الزيوت الطبيعية مباشرة بعد استخدامك للديرما رولر ودة هيحفز الشعر اكتر

طيب ايه افضل مقاس ممكن ابدأ بيه

المقاس اللي ممكن تبدأ بيه لو شعرك خفيف اوي وحالق شعرك هيكون 0.5 مل لحد 1 مل لو بنت اللي بتستخدمه ممكن تجيب من 1مل لحد 1.5 مل

طبعا المقاس دة هو طول الابرة ونبقى عارفين ان مش الابرة كلها بتدخل في فروة الراس لان الشعر بيعمل عازل فبيقلل طول الابرة شوية او بيبعدها شوية عن فروة الراس

 

حاجات مهمة تعملها قبل استخدام الديرما رولر

لازم  تعقم الديرما رولر ودة بيكون عن طريق غسلها في ماء مغلي او رش كحول مطهر طبي عليها قبل الاستخدام وطبعا في الحالتين بتسيبها تنشف

طبعا اهم حاجة انك متستعملش الديرما رولر وانت حاطط اي مستحضر كيماوي زي المينوكسيديل او كريم او جيل او اي شيء يعني تغسل شعرك كويس وتتأكد انه خالي من اي شوائب

بالنسبة للناس اللي شعرها طويل يفضل انك تستخدم الديرما وشعرك رطب او مبلول بعض الشيء عشان الشعر ميتشابكش مع الابر ويضايقك بس لو انت شعرك خفيف ممكن تستعمله وراسك مبلولة او جافة مش هتفرق

طريقة الاستخدام

بنبدأ من  مقدمة الرأس في بداية منبت الشعر زي ماحنا شايفين وبنمشيها براحة على فروة الراس لحد ما نوصل لمؤخرة الراس وبنركز اكتر في الاماكن اللي فيها تساقط للشعر او الشعر الخفيف وبنحاول نمشيها على المناطق دي من 10 الى 15 مرة في كل الاتجاهات يعني بالطول وبالعرض عشان نضمن ان الابر دخلت في كل مكان والخلايا كلها نشطة

 

وحاول متمشيش بالديرما على الشعر رايح جاي لان دة ممكن يعمل جروح وألم في فروة الراس ويفضل تشيلها زي ماحنا شايفين وتبدأ من الاول تاني

وخلينا فاكرين لازم على الاقل ساعة قبل ما تستخدم المينوكسيديل عشان ميحصلش التهابات

وتقدر تستخدم الديرما رولر من مرتين ل 3 مرات في الاسبوع على حسب وقتك

نتيجة الديرما رولر مضمومنه باذن الله خصوصا مع المينوكسيديل

 

نيجي بقا عند موانع الاستعمال

اولا الناس اللي بتعاني من سيولة في الدم

او السكر

او الضغط

او عندها جروح في فروة الراس حديثة

او السيدات الحامل

 

وبكدة نبقى قولنا كل حاجة عن الديرما رولر

وبالنسبة لسعرها فهي مش غالية وسعرها بيكون من 120 ج لحد 350 جنيه على حسب الخامة والماركة وعدد الابر والرؤوس ومش لازم تجيب حاجة غالية

وانا تحت امركم في اي اسالة ومتنسوش الاشتراك في القناة وتفعيل الجرس عشان يوصلكم كل جديد

 

تحياتي

محمد سويلم