وفي الفيديو دة هنتكلم عن تركيب الشعر عن طريق الشبكة الفرنسية او وحدة الشعر او الباروكة الثابتة او ايا كان اسمها ومميزاتها ايه ولمين وايه اضرارها وايه اسعارها وكل حاجة عنها
بس قبل ما نبدأ متنساش شترك في القناة وتفعل الجرس عشان يوصلك كل جديد
أهلا بيكم مرة تانية
انا محمد سويلم والناس اللي اول تشوفني انا كان شعري بالشكل اللي في الصورة دة وحاليا بالشكل اللي حضراتكم شايفينه والفضل يرجع للعلاجات والطرق اللي شرحتها في الفيديوهات اللي فاتت.
وانهاردة هكلمكم عن الشبكة الفرنسية وفي اخر الفيديو هقولكم رايي الشخصي فيها بس خلينا الاول نعرف ايه هي الشبكة الفرنسية او وحدة الشعر
هي عبارة عن باروكة او وحدة شعر بتتلزق في فرة الراس وتكون ثابتة فترة طويلة
طيب ايه اللي يفرقها عن الباروكة العادية
الفرق اولا انها بتكون ثابته وانك بتتعامل معاها معاملة الشعر العادي يعني تغسلها تستعمل معاها سشوار تقصها تغير في التسريحة تستخدم جيل او كريمات عليها كل دة عادي
وتقدر تنزل بيها البحر او حمامات السباحة يعني بتتعامل معاها معاملة الشعر الحقيقي ولكن طبعا بحذر ومش فترات طويلة ولا مرات كثيرة
طيب بتتركب ازاي الباروكة دي او الوحدة دي
في البداية بيتم حلاقة المكان اللي هتركب فيه الباروكة بالموس وبعدها بيتم وضع مادة لاصقة مخصصه للوحدة دي وبعد كدة يتم تثبيتها وقصها بالشكل اللي يتماشى مع شكل شعرك بحيث انه يبان شعر طبيعي الاجراء دة مبياخدش اكتر من ساعة ونص يعني نفس المدة اللي بتقعدها عند الكوافير او الحلاق
هل ليها انواع
في مجتمعنا في من كل حاجة انواع في الغالي وفي الرخيص وفي الاصلي وفي المضروب ولكن بالنسبالك لازم تتاكد ان الوحدة اللي هتستخدمها تحتوي على شعر طبيعي ومش صناعي مهما حاول اللي قدامك يقنعك انه احسن وهيعيش اكتر
ودة لان الشعر الصناعي بيعمل التهابات في فروة الراس مع الوقت بالاضافة انه بيعمل ريحة ووارد طبعا يعمل اكتر من كدة
وبالتالي زي ما بنقول دايما اهم حاجة المكان يكون موثوق فيه وله سابقة اعمال محترمة في نطاق معارفك او عن طريق حد تثق فيه
طيب احنا ركبناها وتمام وشكلنا حلو وكله تمام ايه اللي بيحصل بعد كدة
اولا لازم يتم عمل صيانة وتنضيف ليها كل اسبوعين او 3 اسابيع او شهر كحد اقصى ودة يعني بتفكها وتغير المادة اللاصقة اللي فيها وبالطبع في كل الاحوال هتلاقي ريحة تحتها ودة بسبب التعرق وعدم التهوية بالاضافة لو انت عندك شعر هتحتاج تحلقه بالموس مع كل صيانة حتى لو شعر خفيف عشان ميتسببش في فك اللصق
بالنسبة لعمر الوحدة او بتعيش اد ايه
عمر الوحدة بيختلف على حسب تصنيعها وجودتها ولكن في المتوسط بيكون سنة ولازم تتغير ودي تحطها في حساباتك بردو
نيجي بقا للتكاليف عموما
خلينا عارفين ان التكلفه مش مرة واحدة هتندفع ودة لانك
في بعض الاماكن في مصر بتحسب الشعر بالجرام وفي الاغلب الجرام بيكون ب 15 جنيه
وتقريبا سعر الوحدة في مصر في بيبدأ من 3000 جنيه فيما فوق
وفي السعودية من 2000 ريال فيما فوق لحد 2500 شاملة التركيب
بالاضافة لتكلفة الصيانة الشهرية في المتوسط وفي مصر بتبدأ من 300 جنيه وفي السعودية بتكون تقريبا 250 ريال
والكلام دة لو هتعمل الصيانة في المركز ولكن لو هتعمله في البيت هتحتاج تشتري انت مزيل للمادة اللاصقة وبتجيب المادة اللاصقة انت والحاجات دي ممكن تطلبها من على النت موقع امازون مثلا وهتكلفك من 1200 جنيه ل 2000 جنيه والكمية هتكفيك 4 شهور يعني تقريبا نفس التكلفة.
كدة قولنا كل مميزاتها وبتتركب ازاي
العيوب بقا والاضرار
ممكن تتسبب في حساسية في فروة الراس
وممكن تتسبب في موت البصيلات اللي تحتها لان البصيلات مقفولة ومسام الجلد مقفولة وبالتالي البصيلات بتضعف ومع الوقت بتموت ومتصدقش اللي هيقولك ملهاش اضرار وهو بيبيعهالك وانها امنه والكلام دة كله الا اذا كنت مستغني على اللي باقي من شعرك
يعني لو عندك شعر خفيف منصحكش تعملها الا اذا كنت حاولت فعلا تعالج ومفيش فايدة
تاني حاجة لو بتعاني من اي امراض جلدية اوعا تستعملها لان كدة فروة الراس ممكن تدخل في مشاكل كبيرة جدا
لو ليك تجربة مع الشبكة الفرنسية او وحدة الشعر ياريت تسيبهالنا في كومنت ولو عندك اسألة في اي حاجة تخص الشعر ياريت تسيبها في كومنت ومتنساش لايك للفيديو واشتراك في القناة وتفعيل الجرس عشان يوصلك كل جديد
