السلام عليكم ورحمة الله وبركاته
في ناس كتير سالتني عن ايه نوع المينوكسديل اللي بستخدمه وجاب نتيجة معايا واخد اد ايه وغيرها من الاسئلة
ياريت الاجابة كانت بالسهولة المتوقعه ولكن في الفيديو دة انا هساعدك تختار افضل علاج مينوكسديل لنفسك بناء على نوع فروة راسك وبشرتك
بس قبل ما نبدأ خلينا نشترك في القناة ونفعل الجرس عشان يوصلنا كل جديد
اهلا بيكم مرة تانية
انا محمد سويلم وفي الفيديو دة هنتكلم عن انواع فروة الراس وايه افضل علاجات المينوكسديل اللي ممكن نستخدمها عشان تجيب نتيجة على حسب نوع فروة راسك
يبقى قبل ما نتكلم عن العلاج لازم تعرف ازاي تحدد نوع فروة راسك لو متعرفهاش
وانواع فروة الراس بتنقسم لاربع انواع
اول نوع فروة الراس الجافة
ودي دايما بتعاني من الحكة والقشرة الجافة اللي ممكن توصل انك من الحكة تجرح نفسك ودايما بتعاني معاها لانها بتسبب ان الشعر نفسه يكون جاف من الجذور لحد الاطراف والقشرة فيها بتكون ظاهرة جدا في الشعر وبتكون صغيرة شبه البودرة كدة ولونها مختلف عن لون فروة راسك
النوع التاني فروة الراس الدهنية
دايما حاسس ان فروة الراس فيها زيوت او دهنية والزيوت دي بتبدأ تظهر بعد يوم او اتنين من استخدام الشامبو وبتلاحظ ان دايما مقدمة الراس في منطقة الجبهة فيها زيوت وبتلمع بالاضافة ان الدهون بتضعف جذور الشعر من تحت وبتتسبب في تساقط الشعر مع الوقت.
النوع التالت فروة الراس المخطلته
دي بتظهر اكتر مع السيدات او الرجال اللي شعرهم طويل بتحس ان فروة الراس دهنية لكن اطراف الشعر جافة وخشنه وضعيفة
النوع الرابع والاخير هو فروة الراس العادية
وفروة الراس دي بتحاول تتكيف مع الوضع اللي هي فيه زي مثلا في الصيف بتبقى دهنية وفي الشتا بتكون جافة وفي معظم الاوقات لا دهنية ولا جافة حاجة كدة بين البينين
شعرك مش بيقى دهني اوي ولا جاف وخشن حتى لو مغسلتش شعرك لمدة يومين ولا حتى بتحتاج كريمات او اي مستحضرات تساعدك على تصفيف شعرك .
ودلوقتي بعد ما عرفنا انواع فروة الراس واكيد انت كمان عرفت نوع فروة راسك هنتعرف مع بعض على انواع المينوكسديل والفرق بينهم وايه ينفع لايه
هنبدأ بفروة الراس الجافة والعادية
المينوكسديل بيختلف من شركة لشركة ومن اسم لاسم سواء في شكل العلبة من برة او في تكوينه من جوا
ولذلك مكانش ينفع اقولك انا بستخدم مينوكسديل نوعه كذا هاته هيكون كويس معاك لان ببساطة هو نفع مع فروة راسي انا وانت ممكن فروة راسك تكون مختلفة
انا مثلا فروة راسي عادية مفيهاش جفاف اوفر ولا دهنية وبالتالي استخدمت مينوكسديل اسمه بيرفورما
ودة لان بيرفورما بيحتوي في تكوينه على نسبة زيوت بتفيد فروة الراس الجافة او العادية ومش بتجففها اكتر
معنى كدة لو انت في مصر وفروة راسك عادية او جافة يبقى هات بيرفورما
طب لو برة مصر
هات اي نوع مينوكسديل 5% يكون في تكوينه زيوت او دهني بنفس شكل البيرفورما زي ماحنا شايفين ودة ممكن تعرفه بالتجربة او لما تسأل الصيدلي لو عنده خبرة جيدة هيقولك ايه الافضل
تاني حاجة فروة الراس الدهنية والمختلطة
واضح طبعا من اسمها انها بالفعل فيها زيوت وبالتالي انت مش محتاج تزود الزيوت دي وبالتالي انت محتاج نوع يكون مش فيه زيوت
ولو انت في مصر عندك بالترتيب كدة بيرفكتوديل وهيرجرو وهير باك
ولو برة مصر هتلاقي معظم المنتجات قريبة من ال3 دول فمش هتلاقي صعوبة في انك تلاقي نوع نسبة الزيوت فيه قليلة
يعني باختصار لو فروة راسك دهنية او مختلطة هات مينوكسديل لا يحتوي على زيوت
ولو فروة راسك جافة هات مينوكسديل بيحتوي على زيوت
وفي النهاية اتمنى اكون كنت واضح ومختصر بما يكفي ولو عندك اي اسئلة ممكن تسيبها في كومنت او تكلمني على الفيس بوك وهكون سعيد جدا اني ارد على اسألتك ومتنساش تشترك في القناة وتفعل الجرس عشان يوصلك كل جديد
