تقنية SMP لاخفاء فراغات الشعر
السلام عليكم ورحمة الله وبركاته
دايما في كلامنا بيكون عن علاج الشعر واعادة انباته لكن الحلقة دي هتكون مختلفة شوية
وهتكون عن طريقه او تقنية لاخفاء فراغات الشعر بتقنية اس ام بي او micropigmentation وهنتكلم التقنية دي وفوايدها ومين المفروض يستعملها وبتعيش اد ايه وايه الاعراض الجانبية المحتملة ليها
بس قبل ما نبدأ متتساش تشترك في القناة وتفعل الجرس عشان يوصلك كل جديد
أهلا بيكم مرة تانية
انا محمد سويلم والناس اللي اول مرة تشوف فيديوهاتي انا شعري كان بالشكل دة …..
وحاليا بالشكل دة والفضل يرجع للعلاجات اللي اتكلمت عنها في الفيديوهات اللي قبل كدة واللي هتلاقوها هنا او على قناتي
كلنا سمعنا عن وشم الحواجب لكن مش كلنا نعرف تقنية مشابهه للتقنية دي بس لفروة الراس
التقنية دي اسمها micropigmentation والتقنية بتدي احساس ان الشعر كثيف في الرؤية
وبالرغم ان الاتين بيقو تحت تصنيف الميكروبيجمينتيشن الا ان تقنية الحواجب بيطلق عليها اسم microblading والاتنين مختلفين جدا في طريقة تنفذهم
بس قبل ما نبدأ نتكلم العملية دي بتتعمل ازاي خلينا نعرف مين المستفيد منها
مثلا انت لو حد بتحلق شعرك علطول على الزيرو وعاجبك شكل شعرك كدة ومش عايز تزرع ممكن تستخدم التقنية دي
او حد زارع ومكان الاقتطاف واضح زي الصورة كدة …..
الناس اللي بتعاني من تساقط الشعر بالكيماوي
والصلع او الفراغات الكاملة اللي مفيهاش شعر
الشعر الخفيف وعايز يدي احساس بانه كثيف
وينفع طبعا مع السيدات والرجال
نيجي للفرق بين رسم الحواجب او الميكرو بولدينج والميكروبيجمنتيشن للشعر
يعني مثلا تقنية الميكرو بليدنج للحواجب بتتعمل بشفرة يدوية لكن الميكروبيجمينتيشن بيتعمل عن طريق جهاز تاتو كهربائي
ودة لان فروة الراس سميكة اكتر من الحواجب وبتحتاج قوة اكبر عشان الشفرة تدخل في الجلد.
وزي ما هو معروف في تقنية رسم الحواجب هو رسم خطوط تشبه الشعر في الحواجب لكن في حالة فروة الراس بيتعمل نقاط سودة بطبقات ودرجات مختلفة عشان تحاكي نفس درجات الشعر والظلال اللي في فروة الراس
والاستايل دة اسمه pointillism وبيتعمل عشان يدي شكل طبيعي للرسم دة وميكونش ملفت للنظر
وطبعا مش محتاج اقولك ان مش اي حد يعرف يعمل الطريقة دي عشان يوصلها لنفس شكل البصيله والشعر وبالتالي انت محتاج حد محترف
طيب هل العملية دي مؤلمة ؟
في البداية بيتم وضع بنج موضعي ومع ذلك ممكن بردو تحس بعدم راحة اثناء وبعد العمليه ومدى وجعها او عدم الراحة بيختلف على حسب استحمالك للالم بالاضافة لنوع فروة راسك ودرجة حساسيتها.
طيب ايه المطلوب قبل ما اعمل العملية دي
اولا لازم تغسل فروة راسك كويس جدا وتاخد شاور ودة لانك مش هتقدر تاخد شاور او تغسل راسك او حتى تعرق لمدة 4 ايام او اكتر بعد العملية
لازم تبقى عارف ان الاجراء دة بياخد حوالي من 4 الى 5 ساعات والاجراء بيتم على كذا مرحلة وكذا يوم على حسب المساحة اللي محتاج تغطيها
وبيكون بين كل جلسة وجلسة اسبوعين او اكتر على حسب اللي بيعملك الاجراء وحالة فروة راسك
وهيبقى مطلوب منك بين كل جلسة انك متنزلش البحر ولا حمام سباحة ولا تدخل سوونا او بخار او تاخد دش سخن لان البخار ممكن ياثر على العملية
بالاضافة انك المفروض متخرجش في الشمس لمدة 5 ايام او تلبس كاب لكن بعد خامس يوم ممكن تتعرض للشمس لمدة ساعة في اليوم لو حبيت لكن خليك فاكر ان كل ما قلة مدة بقائك في الشمس كل ما العملية استمرت فترة اكبر وافضل
وفي المتوسط الرسم دة ممكن يعيش من 5 ل 8 سنين وفي النهاية بيبدا يتختفي شوية شوية.
طيب ايه هي اخطار العملية
العملية اخطارها بتعتمد في الاساس على الشخص اللي هيقوم بيها بصفة اساسية
يعني لازم يكون محترف وعارف يتعامل على عمق جيد ميأثرش على بصيلات الشعر الموجودة بالفعل
تاني حاجة نوع المادة الصبغية اللي بيستخدمها لانها مش بتكون نفس الحبر بتاع التاتو وبتتكون من مواد متتسببش في حساسية للجلد او مشاكل في فروة الراس وبالتالي لازم تكون واثق جدا من المكان اللي انت رايحله ومتركزش في السعر فقط
بالنسبة للاسعار بتختلف من مكان لمكان زي الزراعة بالظبط وكمان بتختلف على حسب المساحة اللي هتغطيها بالرسم وعدد الجلسات
وخليك فاكر في الحاجات دي مش دايما الغالي تمنه فيه احيانا بتروح لدكتور او مركز غالي جدا وفي الاخر النتيجة بتكون غير مرضية
والافضل هو البحث الجيد عن المكان وسابقة الاعمال اللي قام بيها في دايرة قريبة منك.
واقل سعر جلسة في مصر تقريبا 4000 جنية فيما فوق على حسب المكان
وفي النهاية لو ليك تجربة مع تقنية الميكروبيجمينتيشن ياريت تحكيهالنا في كومنت ولو حد عنده اسئلة بخصوص الشعر عموما ممكن يسيبها في كومنت او يكلمني على الفيس بوك الموجود في وصف الفيديو وانا هكون سعيد جدا اني ارد عليه
وطبعا متنسوش لايك للفيديو واشتراك في القناة
تحياتي
محمد سويلم
