دورة حياة الشعر ومراحل نموه
السلام عليكم ورحمة الله وبركاته
الفيديو دة انا بعتبرة اهم فيديو انا بعمله لانه بيتكلم عن دورة حياة الشعر واللي هيفهمنا امتى الشعر بيقع وامتى يكون التساقط طبيعي وامتى يكون بسبب التغذية او العلاج سواء علاجات الشعر او علاجات حاجة تانية بتاثر على الشعر وايه هي المراحل اللي الشعر بيقع فيها وهكذا
بس قبل ما نبدأ متنساش تشترك في القناة وتفعل الجرس عشان يوصلك كل جديد
أهلا بيكم مرة تانية
انا محمد سويلم والناس اللي اول مرة تشوفني انا من فترة قريبة كان شكلي كدة وحاليا كدة والفضل يرجع لبعض علاجات الشعر اللي اتكلمت عنها في الفيديوهات اللي فاتت
اما الفيديو دة اتعمل لسببين
الاول اننا نفهم طبيعة شعرنا وايه اللي بيحصل فيه خلال الفترات الزمنيه
والتاني هو انك تعرف امتى المستحضر اللي بتستخدمه هو سبب التساقط ولا في سبب تاني
والبصيلة بتمر ب 4 مراحل
أول مرحلة اسمها Anagen phase او مرحلة النمو
وخلال المرحلة دي شعرك بيكون بينمو باستمرار بدون تساقط او مشاكل والعملية دي بتتراوح من 3 سنين ل 5 سننين وفي بعد الاشخاص المرحلة دي بتستمر معاهم من سنتين ل 7 سنين.
وفي المرحلة دي ممكن طول الشعر يتراوح من 45 سم لحد 76 سم طبعا دة لو محلقناش او قصينا شعرنا.
تاني مرحلة بقا مرحلة Catagen او فترة التراجع
بعد ما البصيلة بتكمل مرحلة الاناجين او مرحلة النمو بتاعتها بالكامل بتبدأ تدخل في مرحلة كتاجين او مرحلة التراجة ودي بتبدأ فيها البصيلة بانها بتصغر في حجمها او تك وتبدأ تخرج من فروة راسك والفترة دي من اسبوعين ل 3 اسابيع
وبالرغم من ان البصيلة بتنفصل عن الجلد في المرحلة دي لكن ممكن متتساقطش الا بعد فتره او اثناء الغسبل او تمشيط الشعر ودة يفسر ان بعض الناس اللي شعرها طويل بيطلع شعر في المشط من غير الم ودة لان البصيلة بالفعل منفصلة عن الجلد
المرحلة التالتة مرحلة Telogen phase اومرحلة الخمول
بعد ما البصيلة بتدخل مرحلة الكاتاجين او التراجع وبعد ما البصيلة تنفصل عن الجلد او فروة الراس بتبدأ تدخل في مرحلة الخمول والمرحلة دي بتستمر من 3 شهور ل 5 شهور قبل ما الشعر الجديد يبدأ يخرج مكان البصيلة الميته ويظهر شعر جديد.
وتقريبا معظم الناس بيكون في شعرهم نسبة تتراوح من 10% ل 20% بتدخل في مرحلة الخمول في اي وقت، أحيانا بسبب بسبب الضغط النفسي او الجسماني او مشاكل مرضية او صحية ودة بيتسبب في ان كمية اكبر من الشعر تدخل في مرحلة الخمول دي ودة بيتسبب في تساقط مؤقت للشعر .
واخيرا مرحلة Exogen Phase او مرحلة التساقط
ودي بتبدأ بمجرد ان البصيلات الجديدة والشعر الجديد يبدأ في النمو، في الحالة دي الشعر القديم بيدخل في مرحلة التساقط وبينفصل نهائيا عن فروة الراس اثناء استخدامك للمشط او الفرشة او حتى وانت بتغسل شعرك او في الشاور
وطبيعي انك يتساقط من شعرك حوالي من 50 ل 100 شعرة في اليوم وبعض الدراسات بتقول 150 شعرة ودة لان الشعر دة بيكون دخل في مرحلة التساقط بصفة يومية
ومعنى كدة انك مش المفروض تتخض او تحس بالفزع لما تلاقي شعرك في المشط لان دة طبيعي ودة لان الشعر الجديد بياخد مكان الشعر القديم وبيكمل دورة النمو بتاعته وبيجدد الشعر وبيديلك عر جديد بدل الشعر اللي وقع في المراحل اللي فاتت و يستمر خلال مرحلة النمو اللي قولنا عليها في الاول.
طيب السؤال هنا اعرف انا في انهي مرحلة ازاي
الشعر مش بيدخل كله في مرحلة واحدة والا يبقى طبيعي جدا تصحى من النوم متلاقيش شعرك كله
ولذلك الشعر بيدخل المراحل دة مجموعه مجموعه
يعني مجموعه من شعرك هتكون في مرحلة النمو ومجموعه في مرحلة التراجع ومجموعه في مرحلة الخمول ومجموعه في مرحلة التساقط وهكذا
ودة عشان شعرك كله ميقعش مرة واحدة
يبقى السؤال الصح يكون هل التساقط اللي عندي طبيعي ولا لا
وفي الحالة دي اقولك لو التتساقط عندك مش بيزيد عن 100 شعرة في اليوم يبقى انت في الطبيعي والكلام دة ينطبق على الناس اللي مش بتعاني من الصلع وشعرهم كامل.
وبردو هيكون مش طبيعي لو بيتساقط من مكان واحد فقط وبالتالي دة يبقى مش طبيعي
اما بالنسبة لتساقط الشعر اثناء استخدام مستحضر زي المينوكسيديل فدة لان المينوكسيديل بيزود سرعة عملية الخمول والتساقط ودة عشان الشعر الجديد والنمو يبدأ وعشان كدة ممكن التساقط اثناء استخدام المينوكسيديل
ولذلك بنقول ان ممكن التساقط يبدأ بعد اسبوع من استعمال المينوكسيديل ويستمر شهر تقريبا وفي المرحلة دي متقلقش واستمر ويفضل متوقفش.
وفي النهاية اتمنى اكون قدرت اشرح العملية بصورة سهله وبسيطة ومتنساش لايك للفيديو والاشتراك في القناة
تحياتي
