لماذا لا تزرع
السلام عليكم ورحمة الله وبركاته
في تعليق اتكرر كتير في فيديوهاتي عن علاجات تساقط الشعر والصلع عموما وعن كلامي عن المينوكسيديل وغيره
والسؤال بيقول انت ليه متزرعش وتريح بالك وتوفر فلوسك
وكومنتات تانية من نوعية دة كذب ومفيش علاج للصلع غير الزراعة وغيره من الكلام دة
مبدئيا خلينا عارفين ان مفيش سنتر زراعة شعر هتروحله ايا كانت حالة شعرك وتقوله عايز ازرع وهيقولك لا
ودي طبيعة تسويقية في معظم الاماكن وهتجيب نتيجة معاك وهتجيب فلوس معاه ولكن فين المشكلة
المشكلة انك هتقابلك مشاكل تانية لو زرعت في الوقت اللي مينفعش تزرع فيه
طيب امتى الوقت دة
خلينا نتكلم عن حالتي مثلا
انا عندي صلع وراثي وشعري زي مانتو شايفين دلوقتي او حتى في الصورة
في شعر والزراعة هي تكملة الفراغات اللي في شعرك
طيب انا معنديش فراغات انا عندي شعر ضعيف واصفر معنى كدة ان في بصيلات
طيب الدكتور هيجي يزرع هيحاول يملى الفراغات وقولنا في فيديو قبل كدة لو البصيلات اتزرعت قريبة من بعضها ممكن تتسبب في مشاكل في فروة الراس زي التخور والتلف وان الشعر ميطلعش
ولو اتزرعت بعيدة عن بعض على مسافات بردو هتبين ان الشعر خفيف
طيب يعني هو الدكتور مش عارف الكلام دة
لا طبعا عارفو بس السؤال هو هيقولك الكلام دة ولا لا دي ترجع لضميره وقتها
طب خلينا بقا نقول ان الدكتور زرع الشعر وبعد سنه الشعرطلع تفتكر شكلك هيبقى طبيعي يعني وكامل ؟
لا طبعا لان ببساطة انت زرعت شعر في اماكن الفراغات وفي وقت العملية شعرك كان كتير ولكن في شعر ضعيف كتير جدا
وبالتالي خلال ال6 شهور هيكون في شعر كتير وقع من المزروع وكمان من شعرك الضعيف اللي موجود بالفعل قبل العملية على ما شعرك يطول هتبقى بالشكل دة
الا اذا بقيت تاخد الادوية زي المينوكسيديل والنوبيشيا والبانتوجار بعد العملية عشان تقوي الشعر الضعيف
طيب ماكان من الاول يعني في الاخر رجعت للادوية
يبقى عندنا سؤال مهم
امتى ازرع وامتى استعمل الادوية
بص يا سيدي لو عندك شعر ضعيف لكن موجود في كل اماكن راسك يبقى الافضل تلجأ للادوية لو عايز تلحق نفسك
لكن لو صلع كامل او في اماكن فاضية تماما ومفيهاش شعر لكن حالة الشعر اللي حواليها جيدة يبقى ممكن تزرع
طيب لو ضعف عام وتساقط مستمر هيبقى قدامك حل من اتنين يا تستعمل الادوية يا تنتظر لحد ما الشعر الضعيف كله يموت وبعدها تزرع وطبعا دة انا مش برشحة
يبقى باختصار في شعر يبقى ادوية
ولو بلاطة يبقى الزراعة
والمدة الزمنية لظهور الشعر والنتايج النهائية في الاتنين زي بعض يعني الزراعة مش هتشوف نتيجة نهائية قبل سنه من الزراعة والادوية كذلك
وفي النهاية لو عندك اسئلة او ليك تجربة مع الزراعة او مع الادوية او الاتنين ياريت تحكيهالنا في كومنت ومتنساش تشترك في القناة وتفعل الجرس عشان يوصلك كل جديد
